ӨМГӨӨЛЬЕ-ХАМГААЛЪЯ НӨЛӨӨЛЛИЙН АЯНЫГ ОРОН ДАЯАР ЭХЛҮҮЛЛЭЭ

Монголын Өмгөөлөгчдийн Холбоо нь нийгмийн хариуцлагын хүрээнд хүүхдийн эсрэг гэмт хэрэг, тэр дундаа өсвөр насны хүүхдүүдийн дээрэлхэлт, дарамт, хүчирхийллээс урьдчилан сэргийлэх, сурагчдад зөв хүмүүжил, төлөвшил, ёс суртахуун, сэтгэл зүй болон хууль, эрх зүйн мэдлэг ойлголт өгөх зорилгоор “Өмгөөлье-Хамгаалъя” нөлөөллийн аяныг өнөөдөр (2026.04.20) орон даяар эхлүүллээ. 

Сүүлийн жилүүдэд нийгмийн хурц асуудал болж, олон нийтийн анхаарал татаад байгаа өсвөр насны хүүхдүүдийн дээрэлхэлт, хүчирхийллийг бууруулах, таслан зогсооход хүний эрхийг хамгаалах үндсэн чиг үүрэгтэй ажилладаг өмгөөлөгчид манлайлж, үүний эсрэг тэмцэлд дуу хоолойгоо хүргэж, хувь нэмрээ оруулж байна.

“Өмгөөлье-Хамгаалъя” аяныг нийслэл, 21 аймаг дахь салбар зөвлөлийн гишүүн, өмгөөлөгчдийнхөө сайн дурын оролцоотойгоор зохион байгуулж буй бөгөөд нийслэлийн 30 ерөнхий боловсролын сургуулийн өсвөр насны сурагчдад зөв төлөвшил, хүмүүжил олгох, ёс суртахуун бий болгох, хууль, эрх зүйн болон сэтгэл зүйн мэдлэг ойлголт өгөх танхимын сургалтыг 4 дүгээр сарын 23-ны өдөр зохион байгуулна.

Монголын Өмгөөлөгчдийн Холбооны орон нутаг дахь салбар зөвлөлийн гишүүн, өмгөөлөгчид тухайн аймгийнхаа Гэмт хэргээс урьдчилан сэргийлэх ажлыг зохицуулах салбар зөвлөл, төрийн болон төрийн бус байгууллагуудтай хамтран гэмт хэрэг, зөрчил, өсвөр насны хүүхдүүдийн дээрэлхэлт, хүчирхийллээс урьдчилан сэргийлэх сургалт, зөвлөгөө, мэдээлэл өгөх үйл ажиллагааг өөрсдийн товлосон цаг хугацаанд зохион байгуулах юм.

Тус аянд нийт өмгөөлөгч нэгдэж, дэмжлэг үзүүлж, оролцож буйгаас гадна Нийслэлийн боловсролын газар, орон нутаг дахь Гэмт хэргээс урьдчилан сэргийлэх ажлыг зохицуулах салбар зөвлөл, холбогдох төрийн болон төрийн бус байгууллагуудад хамтарч байгаа ажээ.