НҮБ-ын Цөлжилттэй тэмцэх конвенцын Талуудын 17 дугаар бага хурал (COP17) манай улсад 2026 оны наймдугаар сарын 17-28-ны өдрүүдэд болно.
COP17-ын бэлтгэл ажилтай холбоотой өнгөрсөн долоо хоногт /2026.01.05-2026.01.11/ өрнөсөн үйл явдлаас заримыг нь тоймлон хүргэж байна.
БАЙГАЛЬ ОРЧИН, УУР АМЬСГАЛЫН ӨӨРЧЛӨЛТИЙН САЙД Б.БАТБААТАР УРИАЛГА ГАРГАВ
Монгол Улс "COP17"-г "Эх байгалиа сэргээж, итгэл найдвараа бадраая" уриан дор зохион байгуулах гэж байна.
Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP-17)-ыг зохион байгуулах үүрэг бүхий Үндэсний хорооны дарга бөгөөд Байгаль орчин, уур амьсгалын өөрчлөлтийн сайд Б.Батбаатар уриалга гаргалаа.
“…Манай газар нутгийн дөрөвний гурав нь их бага хэмжээгээр цөлжилтөд өртөж, усны хомсдол, бэлчээрийн талхагдал улам бүр хүрээгээ тэлсээр байгаа нь бодит байдал болсон. Уур амьсгалын өөрчлөлт Монгол Улсад дэлхийн дунджаас 3 дахин хурдтай явагдаж байгаа нь биднийг бусад улсаас 3 дахин илүү санаачилгатай, 3 дахин илүү хариуцлагатай ажиллахыг шаардаж байгаа нь ч гашуун үнэн. Ийм цаг үед ирэх жил Монгол Улс Цөлжилттэй тэмцэх НҮБ-ын конвенцын талуудын 17 дугаар бага хурлыг эх орондоо зохион байгуулах гэж байна. Дэлхийн 197 улсын төлөөлөл цуглаж чуулна.
Бид түүхэн хариуцлага, бас боломжийн өмнө ирээд байна. Хурлыг зохион байгуулаад зогсохгүй, гарах шийдэл, шийдвэрт өөрсдийн оролцоог олон талаар тусгахаар ажиллаж байна. Учир нь шинжлэх ухааныг уламжлалт мэдлэгтэй хослуулах нь гарц шийдэл гэдгийг бүх дэлхийгээрээ хүлээн зөвшөөрч эхэлсэн. Байгальтайгаа зохицон амьдарч, эх газрын эрс тэс хатуу ширүүн нөхцөлийг даван туулж ирсэн нүүдэлчин ахуй, уламжлал, хүн төрөлхтний хамтын соёлыг даван туулах хамтын шийдэл болж чадна гэж олон улс үзэж, найдаж байгааг НҮБ-аас шийдвэрлэсэн 2026 оныг Монгол Улсын санаачилгаар Бэлчээр ба нүүдлийн мал аж ахуй эрхлэгчдийн олон улсын жил болгосон явдал гэрчилнэ.
Бид нэгэн цагт дэлхийн бодлогыг тодорхойлж, энх цагийг тогтоож байсан шигээ дэлхий нийтийн хамтын сорилтыг шийдэхэд хувь нэмрээ оруулах боломжтой гэдгийг бүгд ойлгож, энэ үйл хэргийг дэмжээсэй хэмээн та бүхнээсээ чин сэтгэлээсээ хүсье. Үр дүнг нь өнөө үе, бас дараа үе хүртэнэ, дангаар хүртэхгүй, бүгд хамтдаа хүртэнэ. Эх дэлхийгээ сэргээж, итгэл найдвараа бадраая.” гэж уриалгад дурджээ.
АЮУЛГҮЙ БАЙДЛЫН ДЭД ХОРООНЫ ДЭД АЖЛЫН ХЭСЭГ ХУРАЛДАВ
Цөлжилттэй тэмцэх тухай НҮБ-ын конвенцын Талуудын бага хурал (COP17)-ын үеийн дээд, өндөр хэмжээний зочид болон хуралдааны аюулгүй байдлыг хангах Аюулгүй байдлын дэд хороо нь 11 дэд ажлын хэсэг байгуулаад байна.
Аюулгүй байдлын дэд хорооны Хүний нөөц, сургалт хариуцсан дэд ажлын хэсэг өнөөдөр буюу 01-р сарын 07-нд хуралдлаа.
Хуралдаанаар:
- Чиглэл чиглэлийн асуудлаар сургалт зохион байгуулах,
- Хамгаалалтанд оролцох бүх бие бүрэлдэхүүнийг сонгон шалгаруулах ажлуудыг эхлүүлэх талаар ярилцаж, санал солилцож, төлөвлөгөө гаргав.
Энэхүү сургалт, сонгон шалгаруулалт нь COP17-ын аюулгүй байдлын стратегид чухал үүрэг гүйцэтгэх юм.
НОГООН БҮС ХАРИУЦСАН ДЭД ХОРОО ТӨЛӨВЛӨГӨӨНИЙ ТӨСӨЛ, ЦАГ ҮЕИЙГ АСУУДЛЫГ ХЭЛЭЛЦЛЭЭ
Цөлжилттэй тэмцэх тухай НҮБ-ын конвенцын Талуудын 17 дугаар бага хурал (СОР17)-ыг зохион байгуулах Үндэсний хорооны дэргэдэх Ногоон бүс хариуцсан дэд хорооны IV хуралдааныг 2026 оны 01 дүгээр сарын 08-ны өдөр болов. Хурлыг тус дэд хорооны дарга, Улаанбаатар хотын Ерөнхий менежер бөгөөд Хотын Захирагчийн Ажлын албаны дарга Г.Батзориг удирдан явууллаа.
Хурлаар дэд хорооны бүрэлдэхүүнийг өргөтгөх, 2026 оны календарьчилсан төлөвлөгөөний төсөл, зарим цаг үеийн шинжтэй асуудлыг хэлэлцэж, шийдвэрлэв.
Сэтгэгдэл (0)
Сэтгэгдэл бичигдээгүй байна