Хан-Уул дүүргийн 21 дүгээр хорооны нутаг дэвсгэрт 17.19 га газарт БНСУ-ын Засгийн газрын 266 сая 885 мянган ам.долларын хөнгөлөлттэй зээлийн санхүүжилтээр хэрэгжиж буй “Солонго-1” /MON 18/, Солонго-2” /MON19/ орлогод нийцсэн орон сууцны хороолол барих төслийн барилга угсралтын ажил 60 хувьтай үргэлжилж байна. Төслийн барилга угсралтын ажил 2024 оны гуравдугаар сард эхэлсэн бөгөөд 2027 онд бүрэн дуусах юм. Эхний ээлжийн 2042 айлын 27 блок барилгыг 2026 оны III улиралд ашиглалтад оруулахаар төлөвлөн ажиллаж байна.
Төслийн захиалагчаар Хот байгуулалт, барилга, орон сууцжуулалтын яам, захиалагчийн хяналтыг “Төрийн орон сууцны корпораци” ТӨХХК, зөвлөх үйлчилгээг БНСУ-ын “Samoo” түншлэлийн гишүүн “Мүүён си эм” төлөөний газар, ерөнхий гүйцэтгэгчээр “Колон глобал корпораци, туслан гүйцэтгэгчээр “Гранд слаб инвест” ХХК тус тус ажиллаж байна.
Тус төсөл нь ухаалаг дэвшилтэт технологийг шингээсэн, ногоон хөгжлийн чиг хандлагыг тодорхойлсон, эрчим хүчний хэмнэлттэй, орлогод нийцсэн 5002 айлын 66 блок орон сууцны хороолол. “Солонго 1, 2” төслийн онцлог нь барилга хоорондын зай нь БНСУ-ын барилгын стандартын дагуу төлөвлөгдсөн, ногоон байгууламж бүхий цогцолбор хотхон юм. Мөн нарны гэрэл халхлагдахгүй, эрчим хүчийг хэмнэх зорилгоор байгаль орчинд ээлтэй шийдлээр нарны эрчим хүч хураагуур ашиглан нийтийн эзэмшлийн хэсгийн гэрэлтүүлгийг цахилгааны хэмнэлтэт аргаар шийдсэн. Интерьерийн хувьд давхар хоорондын чимээ, доргилтыг нэвтрүүлэхгүй, шалны дор зориулалтын дуу тусгаарлагч суурилуулсан. Галын дохиолол, хяналтын камер, домофан систем, гадна зогсоолын нэвтрэх системүүдийг нэгдсэн серверээр хянана. Түүнчлэн айл тус бүр шилэн кабельд холбогдсон учир интернэтийг өндөр хурдаар ашиглах боломжтой.
Одоогийн байдлаар “Солонго 1, 2” орлогод нийцсэн орон сууцны хороолол барих төсөлд ямар нэгэн урьдчилсан захиалга аваагүй тул иргэд та бүхэн “Төрийн орон сууцны корпораци” ТӨХХК болон албан хаагчдын нэрийг барьж бүртгэлд хамруулна, оочер дараалалд оруулж өгнө гэх залилангийн гэмт хэрэгт өртөхөөс сэрэмжлээрэй. Албан ёсны мэдээллийг www.tosk.gov.mn вэб сайт болон 7288-7788 дугаарын утсаар авах боломжтой.
Сэтгэгдэл (0)
Сэтгэгдэл бичигдээгүй байна